راندا يونس.. تكتب : مراية الحب مش عامية

كنت دايما بسمع إن مراية الحب عامية وكنت استغرب الجملة واقول اى الهبل ده لحد ماعرفت فعلا انها حقيقية وفعلا عامية وخارسة وطارشة كمان لان كل واحد بيشوفك بدماغه هو ونظرته هو، يعنى انت عادى فى نظر اللى مايعرفكش، ومغرور فى نظر اللى بيكرهك، وكويس فى نظر اللى يعرفك، ورائع ومفيش منك فى نظر اللى بيحبك، وده معنى ان مراية الحب عامية، لان اللى بيحبك بيشوفك بقلبه مش بعينه.

كل حد بيحبك بيبقى فعلا اعمى عن عيوبك ومش بيشوفها ولا بياخد باله منها، حبه ليك بيصورله انك احسن واحد فى الدنيا وعيوبك بالنسباله مزايا، وبرغم ان ده فى اوقات كتير بيكون حاجة حلوة لينا ومصلحة لكن فى الحقيقة ده غلط لان مراية الحب لازم تبقى شايفاك كويس بعيوبك قبل مميزاتك لانها انعكاس ليك، وضميرك اللى بيصحيك، والقاضى اللى بيحكم عليك وقت الغلط، وصوت العقل اللى بيفوقك وقت الغفلة.

اللى يحبك صح هو اللى يعرفك عيوبك ويساعدك تغيرها، اللى بيحبك بجد هو اللى مش هاتتكسف انك توريه اخطاءك عشان عارف ان على اد حبه ليك على اد ماهيكون سند وضهر ليك ودراع ياخد بايدك للصح، ويكون مرايتك اللى توريك حقيقتك من غير كدب او تجميل.